Allah tujhe babe-hawayej ka wasta

Shaafi hai tu mareez ko ab jald de shifa

Kaisa maraz hai aati nahi hai dawa bhi kaam

Roti hai shab tadapke, sisakti hai subho-shaam

Leta hai hasrato'n se jaha'n bas tera he naam

Be-maut mar rahe hain hame ab tuhi bacha

Kaisi waba hai aata nahi koi aas-paas

Ek hashr sa bapa hai nahi hosh aur hawas

Marne ke khauf se hai dile-natawa'n udas

Ghere hue hai rooh ko jaise koi bala

Shehrekhamosha'n murdo'n se ab hain pate hue

Phirte hain baap beto'n ke laashe liye hue

Shamshan me Chitaoun ke mele saje hue

Mayyat ko kitni ghuslo-kafan tak nahi mila

Kitne darakht aandhi se pal me ukhad gaye

Bacchon se baap, baap se bacche bichad gaye

Ghar-ghar wo maut aayi ke ghar-ghar ujad gaye

Kaisa hai roug jane khuda kaisi hai waba

Yaad aata hai Damo'n ka ukadna wo baar-baar

Wo bekasi wo aaho-buka, cheekh aur pukar

Zainab ke sabr se hame mil jata hai qarar

Bhai pe ek behan ne kiya baccho ko fida

Jo zakhm zindagi ko mile bhar na payenge

Humse bichad gaye hain jo wo yaad aayenge

Apno ke dard khoon ke ansoo rulaenge

Mar jate hum jo saamne hoti na karbala

Parwardigar hai tujhe Asghar ka wasta

Qasim ka wasta Ali Akbar ka wasta

Abbas ibne fatahe khaibar ka wasta

Tu hai Kareem apna karam hum pe kar zara

Haqqaniyat me hote hain jo log be- Nazeer

Ahle-wila hain soofi hain darvesh hain faqeer

Hakim ne jinko kar diya hai be-khata aseer

Qaide-sitam se kar de unhe jald he riha

Kiski nazar lagi ke tijarat hui tamaam

Karwat li aysi waqt ne nemat hui tamaam

Duniya ne munh ko phera jo daulat hui tamaam

Raziq hai rizq ghaib se tu kar hame ata

Beemariyo'n me jab se giraftaar ho gaye

Hum to sabhi ke waaste ek baar ho gaye

Jinke liye thhe phool kabhi, khaar ho gaye

Mohtaj tu kisi ko kisi ka nahi bana

Wo mushkilaat hum pe padi'n choor ho gaye

Hum dekhte he dekhte majboor ho gaye

Maqrooz kya hue hain ke sab door ho gaye

Kar de hamare qarz ko jaldi se tu ada

Tauqeer aur Tejani ki hai ye hi aarzu

Shohdaye-karbala ki karen bas wo guftugu

Nasle'n bahaye unki ghame shah me lahu

Chalta rahe ye nauha-o-matam ka silsila