Haaye Alamdaar, Haaye Alamdaar

Kehtey they kamar thaam ke yeh sayyad e Abrar

Haaye Alamdaar, Haaye Alamdaar

1) Yeh haal hai laashey ka sambhaala nahi jaata

Teer aankh se bhaayi ki nikaala nahi jaata

Imdaad ko aajiye ya Haidar e Karrar

2) Zainab ne teri aas pe chora tha Madina

Main kaise bataaun usse Saqqa e Sakina

Maara gaya Zainab teri chaadar ka nigehdaar

3) Tum qatl huwe hum pe bhi chal jaayegi shamsheer

Aghyaar mein reh jayegi tanha meri hamsheer

Zainab ki rida bachne ke baaqi nahi asaar

4) Jis tarha se ghar laaey they masjid se Ali ko

Us tarha se le jaayenge khaime mein jarri ko

Akbar merey bhayi ka janaaza karo tayyaar

5) Baazu bhi qalam ho gaye ay baazu e Shabbir

Tukrey hai badan aankh mein paiwast huwa teer

Kisne yeh meri Maa ki duaaon pe kiya waar

6) Aati hai sada lootlo namoos e Nabi ko

Ab maarna aasaa(n) hai Hussain ibn e Ali ko

Marney pe terey jashn manaatey hain sitamgaar

7) Akbar humein mushkil se bohot laaey hain bhaayi

Maidaan mein girtey huwe hum aaey hain bhaayi

Aankhein to zara kholo merey moonis o ghumkhaar

8) Ik baat tumhein karb ki batlaata hoon bhaiyya

Jab bhi maasooma ke maarega tamaacha

Ro ro ke pukaregi Sakina tumhey har baar

9) Tha Mir Takallum yehi Shabbir ka noha

Jaatey huwe poora karo armaan hamara

Ay bhaayi hume bhaayi pukaaro zara ik baar