Pathar hataa ke laash se, Zainab ne di sadaa

Kya tum mere Hussain ho

Kaise parey hain jism ke, tukrey judaa judaa

Kya tum mere Hussain ho

Haye haye mere ghareeb ka, kya haal kar diyaa

Ghoron se laasha dasht mein paamaal kar diyaa

Pehchaanu kis tarhaa se, badan se hai sar judaa

Kya tum mere Hussain ho

Pehchaan lungi main tumhey, awaaz mujh ko do

Dam tortey jo dekhaa hai, karyal jawaan ko

Aankhon mein ab behen ki, ujaala nahi rahaa

Kya tum mere Hussain ho

Pehchaan naa tumharey liey, bhi kathin huwaa

Dekhaa hai pehli baar jo, Zainab ko be ridaa

Aati hai sharm jald, bataa do mujhey zaraa

Kya tum mere Hussain ho

Karta raha hai zibha ki, koshish kahaan kahaan

Khanjar ke hain kati huwi, gardan pe bhi nishaan

Kaata hai kis tarhaa se, sitamgaar ne galaa

Kya tum mere Hussain ho

kya legaaey hi loot ke, sab kuch yeh ashqiyaa

Tan par bachaa hai maa ka yeh, kurtaa silaa huaa

Nikley they jab khayaam se, yeh haal to na thaa

Kya tum mere Hussain ho

Aahistaa se jawaab do, hai saath uski maa

Kya ab tumhaarey paas hai, maasoom be zabaan

Nanna sa laasha kiska yeh, seeney pe hai rakhaa

Kya tum mere Hussain ho

Dekho bandhi hain haathon mein, merey bhi rassiyaan

Ab aur lo behen ki naa, ghurbat ka imtehaan

Kuch do jawaab do mujhey, Sughra ka waastaa

Kya tum mere Hussain ho

Wo bhi tumhaari tarhaan se, zakhmi na ho kahin

Dil ko merey yeh lagtaa hai, maujood hai yehi

Aati hai maa ke roney ki, nazdeek se sadaa

Kya tum mere Hussain ho

Zainab pukaari 'Mir Takallum' ba sad malaal

Kya martey waqt bhi merey pardey ka tha khayaal

Hai muttiyon mein kis liey, yeh khaak e Karbala

Kya tum mere Hussain ho

Pathar hataa ke laash se, Zainab ne di sadaa

Kya tum mere Hussain ho