(Intro:)

Jab huay baazu e Abbas qalam, darya par

Gir ke thanda hua, Hazrat ka alam, darya par

Gharq e khoon hogaya, wo behr e karam darya par

Ghul tha zakhmi hua, saqqa e haram, darya par

Mashk ko daanton mein, pakrey yu(n) laata hai

Dahan e Sher mein, jis tarha shikaar aata hai

Al gharas laasha e Abbas pe aaey Mola

Sar ko zaanu pe, rakha aur yeh ro ro ke kaha

Bhaayi to aaj humey, kehdo Khudaraa bhaiyya

Nazza mein bhaayi ko, Abbas ne bhaayi bola

Aakhri saans li, aur daar e fanaa chor diaa

Bhaayi ne bhaayi ki, aaghosh mein dam tor diaa

Abbas haaye Abbas

Hazrat se juda hogaya, Abbas sa bhaayi

Pardes mein looti gayi x2 Haidar ki kamaayi

Hazrat se juda hogaya, Abbas sa bhaayi

1) Sheh ne yeh kaha laasha e Saqqa e Haram pe

Baba ki tarha tum bhi, juda hogaey hum se

Do baar yateemi meri, behnon pe hai aayi

2) Mazloomi se maqtal mein chalaa hi nahi jaata

Jab khaak pe girtey hain, utha bhi nahi jaata

Ghazi ki shahadat ne, kamar aysi jhukaayi

3) Bachi ne kaha Shaah se, farz apna nibhaaoon

Nazdeek agar hai to, basti to main jaaoon

Ammu ka kafan laaeygi, Ammu ki fidaayi

4) Abbas ke bachon se, main sharminda rahoongaa

Maqtal se uthaa laaya hoon, har aik ka laasha

Afsos ke Abbas ki, maiyyat na uthaayi

5) Khat khaak pe detey they, qadam zeen se jis ke

Maidaan mein us Sher ke, itney huay tukrey

Sajjad ne chaadar mein wo, maiyyat hai uthaayi

6) Darya pe tarapney lagaa, yeh dekh ke manzar

Yaad aaney lagaa seena e, hum shakl e Payambar

Jab mashk katey haath se, Mola ne churaayi

7) Sadiyon se hai taari, yeh fizaa ranj o alam ki

Yeh chaand jo ohjal hua, nazron se haram ki

Phir Saani e Zahra ne, kahan Eid manaayi

8) Ammu ki judaayi pe bauhat, roay hai Baba

Samjhaati hai ro ro ke, yeh bachon ko Sakina

Ab denaa nahi koyi bhi, paani ki duhaayi

9) Har maatmi seeney mein bapaa hoga talaa tum

Is saal tera jaana, to mushkil hai "Takallum"

Nohay ki magar Karbobala tak hai rasaayi