Jab Tarayi Ka Shahedeen Ne Manzar Dekha

Jism Se Door Kate Shano'n Ko Bikhra Paya

Sar Se Behta Tha Lahu Ankh Thi Khoo'n-Aalooda

Lab Pe Ghazi Ke Sada Thi Faqat Aaqa Aaqa

Haye ! Wo Shah Ka Kehna Mere Bhai Abbas

Tum Se Pehle Mujhe Kyo'n Maut Na Aayi Abbas

Haye ! Wo Shah Ka Kehna Mere Bhai Abbas

Ay ! Mere Sher Zara Ankhe'n To Apni Kholo

Bhai Aaya Hai Tumhara Zara Kuch To Bolo

Kis Ne Ye Zakhm Lagaye Mere Bhayi Abbas

Haye ! Wo Shah Ka Kehna Mere Bhai Abbas

Sheh Ki Aawaz Pe Abbas Ne Ankhe'n Kholi'n

Aysa Lagta Tha Kate Baazu Se Bahe'n Kholi'n

Bole Sheh Tum Ne Azeeyat He Uthayi Abbas

Haye ! Wo Shah Ka Kehna Mere Bhai Abbas

Tum Ko Maloom Hai Akbar Ko Lagey Zakhm Shadeed

Ho Gaye Dekhte He Dekhte Qasim Bhi Shaheed

Ho Chuki Aun-o-Mohammad Ki Judayi Abbas

Haye ! Wo Shah Ka Kehna Mere Bhai Abbas

Ab To Asghar Hai'n Ke Jhoole Se Gire Jaate Hai'n

Jung Ke Waaste Betaab Hue Jaate Hai'n

Reh Gayi Nanhe Mujahid Ki Ladayi Abbas

Haye ! Wo Shah Ka Kehna Mere Bhai Abbas

Shahe-Kaunain Ye Bole Na Kaho Ab Aaqa

Bhai Ho Bhai Kaho Ya Kaho Mujh Ko Bhayya

Ek Kasak Reh Gayi Kehte Mujhe Bhai Abbas

Haye ! Wo Shah Ka Kehna Mere Bhai Abbas

Aakhri Saans Thi Abbas Pukare Bhai

Bhai Kehte He Abul-Fazl Ko Phir Neend Aayi

Sheh Ne Seene Se Lipat Kar Kaha Bhai Abbas

Haye ! Wo Shah Ka Kehna Mere Bhai Abbas

Jab 'Tejani' Ne Padha Ro Ke Kalame-'Tauqeer'

Lashe-Abbas Pe Dil Thaam Ke Bole Shabbeer

Maaregi Mujh Ko Tumhari Ye Judayi Abbas

Haye ! Wo Shah Ka Kehna Mere Bhai Abbas