Haaye Sakina

Ay Baad-e-Saba jaa ke ye Ammu ko bataana

Pyaasi hai Sakina

Iss chotey se sin me ye sitam mai(n) ne uthaaey

Allah kissi ko na yateem aisa banaaey

Khud apne lahu mei(n) koi bachi na nahaaey

Mai(n) tum ko bulaati rahi, tum bhi to na aaey

Mai(n) ban gayi baad Asr laeeno(n) ka nishaana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Paani ki talab mujh ko khilaati rahi thokar

Kehta tha laee(n) doonga mai(n) fawjo(n) ko pila kar

Jab Shimr laee(n) kar chuka seyrab ye lashkar

Dikhlaa ke mujhe phek diya paani zamee(n) par

Tab samjhi mai(n) kya hota hai umeed dilaana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Ik jaam huwa Sham-e-Ghareeba(n) mei(n) mayasar

Woh kuza mai(n) rakh ayi thi Asghar ki lahad par

Tha mujhse bhi chota mera bhayya mera dilbar

Sharminda mai(n) ho jaati Chacha pyaas bujhaa kar

Ab apne hi haato(n) se meri pyaas bujhaana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Ik rassi mei(n) hum sab ke gale baandh ke adaa

Karte huwe tashheer chale janib-e-Kufa

Aur uss pe musibat ye thi qad chota tha mera

Utthtee(n) thi jo phuppiyaa(n) to galaa khichta tha mera

Gardan ka mere zakhm Chacha dekhne aana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Jis roz se Asghar ko mila Baba ka seena

Us roz se Ammu nahi so payi Sakina

Iss haal mei(n) jaoongi mai(n) kis tarha Madina

Ajaaye mujhe maut, hai kis kaam ka jeena

Jaagi hoo(n) bohat, aa ke Chacha mujh ko sulaana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Ghar laut ke jaate hai(n) har ik shaam parindey

Qismat mei(n) likhe hai(n) mere zindaa(n) ke andherey

Kab tak mai(n) jiyoo(n)gi yu(n)hi ashko(n) ke zahaarey

Lagtaa hai ke marjaoo(n)gi ab door watan se

Hoga na mayassar mujhe ghar laut ke jaana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina

Anwar ye sada parcham-e-Abbas se aayi

Mai(n) bhool nahi sakta Sakina meri bachchi

Kaatey gaye baazoo mere, majboor tha bibi

Mashkeeza alam mei(n) hai laga, dekhle ab bhi

Parcham ka mere kaam hai dunya ko bataana

Pyaasi hai Sakina

Ay Baad-e-Saba jaa ke ye Ammu ko bataana

Pyaasi hai Sakina